NANANATILING huli o nangungulelat ang export sector ng bansa sa Asian neighbors.

Bunsod nito, inilunsad ni Pangulong Ferdinand Marcos Jr. ang mga plano ng kanyang administrasyon para sa Philippine export sector sa susunod na anim na taon.

Sa International Trade Forum sa Taguig City,  pinangunahan nina Pangulong Marcos at Trade Secretary Alfredo Pascual ang unveiling ceremony ng Philippine Export Development Plan (PEDP) for 2023 to 2028, naglalayong gawin ang Pilipinas bilang “agile export powerhouse in key industries” at isang “leading exporter of high-value products and services” bago matapos ang termino ni Pangulong Marcos.

Sa talumpati ni Pangulong Marcos, sinabi nito na habang ang Philippine exports ay lumalago, ang bansa ay patuloy na humahabol sa international trade market.

Tinukoy ang “less diverse export portfolios” at maging ang “trade barriers at  frictions.”

“I came across a rather eye-opening statistic… that 40 percent of all our exports are only one product. So the level of diversification is something that we have to look at and we have to improve in the coming years,” ani Pangulong Marcos.

Sa kabila nito, sinabi ng Punong Ehekutibo na kumpiyansa siya na ang industriya ay patungo sa ‘maliwanag na bukas’.

“We also recognize that there’s a great potential in the sector. No less than $49 billion worth of revenues remains untapped,” ani Pangulong Marcos.

Sa kabilang dako, sinabi ng Pangulo na bukod sa PEDP, tutulungan ng Regional Comprehensive Economic Partnership (RCEP) ang Pilipinas para palakasin ang exports nito.

(CHRISTIAN DALE)